上月17日為Mani生日，謝霆鋒、容祖兒同蔡卓妍難得合體齊齊為霍汶希補祝生日，霍汶希PO四人齊齊切蛋糕嘅合照，留言：「多謝霆鋒、祖兒、阿Sa百忙之中聚埋一齊為我補過生日，最驚喜真喺莫過於呢個特備蛋糕，真係好驚喜#暗藏玄機#驚喜爆燈。」唔少人都好好奇蛋糕有咩咁特別，同埋點解一個蛋糕會有兩個樣，Mani隨即再post出燒蛋糕短片，原來係早前好hit嘅「燃燒蛋糕」！

Mani留言睇得出佢好開心一班「仔女」同佢慶生：「呢個蛋糕真係不得之了~ 係咁叫我燒自己，真喺好騎呢㗎#我個囡都夠曳#謝霆鋒都唔差#真係大吉利是#好彩我百無禁忌#祖兒就叻啦#知你想講衰嘢但你忍住咗#Sa最有心思#準備呢個咁驚喜嘅蛋糕。」片中只係影住蛋糕，但其他人就七嘴八舌，原本蛋糕有一張霍汶希的靚相，蔡卓妍就故Mani將蛋糕上嘅相「燒少少」，最初Mani戰兢表示：「唔燒得唔得呀？」不過佢哋都冇理，蔡卓妍仲出手相助拎起蠟燭，謝霆鋒就話係「滴蠟滴落自己度」。開始燒之後，「曳仔」謝霆鋒再爆出一句：「塵歸塵、土歸土。」Mani同阿Sa即時鬧爆：「啋過你呀！」蛋糕上嘅靚相一邊燃燒時，「氣氛小組」容祖兒高八度叫：「Mani，好開心呀！」 謝霆鋒接着說：「呢啲叫火紅火綠，紅紅火火。」容祖兒說：「大紅大紫呀！」

快盈彩票靚相燒完後，底下出現咗一張Mani嘅「醜照」，Mani同霆鋒、祖兒都認唔到，問係邊個，蔡卓妍原來超有心思，靜靜搵Mani囡囡拎相：「係你個女畀㗎，係佢整㗎。」霍汶希就說：「我明白喇，Hanni你好曳，你好嘢！我好嬲佢呀！」不過聽落就勁sweet！

唔少網民睇完都話霆鋒「百厭」，不過就大讚佢可愛同「百無禁忌」，留言：「Mani話怕咗你班嘩鬼。」、「塵歸塵土歸土笑死我」、「好酷又好有心的蛋糕，Mani生日快樂！」而祖兒畀Mani話「知你想講衰嘢但你忍住咗」，有網民就搞笑表示：「祖兒的沉默震耳欲聾。」

圖片來源：Instagram