溫文爾雅的Jeremy能駕馭妖治曲風及造型，尤其舞台上的表現，與外表充滿野性美的Nana襯到絕！Jeremy曾接受商台節目《雲妮鍾情》訪問時，自言遇上Nana前只養過狗仔：「本身聽人講貓貓好冷淡，會驚人…但當我真正接觸到貓貓，其實佢哋好得意，但可能要畀多啲時間，培養多啲感情，佢就會好黐好黐你㗎喇！」

Jeremy從貓義工領養Nana，義工姐姐曾指Nana有點公主病，但Jeremy認為好正常：「貓成日覺得自己係主人，我又覺得幾cute。到我養Nana嘅時候，發覺佢有少少大小姐脾氣，唔知點解佢無啦啦會嬲，跟住發出嬲嘅聲音，同時佢又好活潑、好動，又好黐人。Nana一啲都唔怕人，好親人，陌生人都可以同佢玩，佢差唔多嚟咗我屋企一、兩日，就同我好親近，越嚟越發覺佢好嗲，好似長期都要黐住我。」他笑言回家時聽到Nana叫喚，便感覺超級幸福。

然而Jeremy本身對貓毛敏感，會打噴嚏、感到痕癢等：「我養Nana時都有心理準備，狂食過敏藥令自己好受啲，點知養佢幾日後，有朝起身腫到好似豬頭咁樣，眼腫鼻腫，完全唔似係原本嘅我，即刻走去睇醫生，醫生話我過敏好嚴重，開咗藥畀我，我食完藥之後，到而家都再冇過敏反應！」Jeremy不時影低Nana的可愛姿態，今年初他曾病倒，在床上休息幾天，Nana幾乎全程在床上陪伴他，非常貼心。

豹貓又名孟加拉貓，身上有十分搶眼的美麗斑紋，雖然牠們外表野性高冷，不過其實性格親人又好奇心重，而且十分聰明，智商跟四歲的人類差不多，只要多加訓練便能明白主人指令。

圖片來源：IG